Perífrases verbais/Perífrases galegas/Perífrases aspectuais

A noción de aspecto está relacionada ca de tempo verbal, pero distínguese desta: por tempo enténdese a situación dun momento con respecto a outro, e a perspectiva con que o falante o contempla; o aspecto é indiferente á posición do falante no eixo temporal, refírese ó proceso, ó tempo interno da acción verbal considerada en si mesma, sen relación con outras accións nin ca sucesión temporal.

Perífrases imperfectivas

A acción contémplase na súa duración, como proceso que se está desenvolvendo

• ANDAR + XER. / ANDAR + A + INF.: O cóengo andaba lendo o teu libro.
• ESTAR + XER. / ESTAR + A + INF.: Aí o vén, estouno vendo.
• IR + XER.: Foille aumentando a necidade.
• LEVAR + XER / LEVAR + A + INF.: Leva a facer das súas toda a vida.
• SEGUIR + XER. / SEGUIR + A + INF.: Todos os tres seguen a bimar.
• SER + A + INF.: Ten un carácter resultativo, que a distingue das anteriores; aínda que non aparece moito na literatura, é moi frecuente na fala: Todos tres son a comentarme a súa deslealdade.
• VIR + XER.: Cumpriu todo aquilo co que viña ameazando.

Perífrases perfectivas

Contemplan a acción como proceso rematado.

• ACABAR ou REMATAR + DE + INF.: Rematou de testemuñar daquela.
• VIR + DE + INF.: Viñan de pescudar todo o ocorrido.
• DEIXAR(SE) + DE + INF.: Deixou de metrallar cando cesou o movemento.
• DAR + PART.: Non dou alugado a habitación
• LEVAR + PART.: Xa levo apisoado tres cascudas
• TER + PART.:

-Non é perífrase: Cando acompaña ó verbo ter un participio dun verbo transitivo e este participio concorda co seu obxecto directo: Tiña rotos os zapatos

-Perífrase perfectiva de carácter reiterativo: Tenme avantaxado decote.

• IR + PART.: Meu avó vai enganido de vez.

Perífrases reiterativas

Expresan reiteración.

• VOLVER + INF.: Volvín custearlle os estudos outro cuadrimestre.

Perífrases incoativas

Refiren o proceso no comezo.

• COMEZAR ou EMPEZAR + A + INF.: Comezaron a apupalo axiña
• BOTAR(SE) + A + INF.: Botouse a amontoar os garavanzos.
• POÑER(SE) + A + INF.: Puxéronse a preparar a comuñón.
• DAR + EN + INF.: Deron en limpar a bixutería cunha baeta.
• BRINCAR, SALTAR, ROMPER, PEGAR + A + INF.: Rompemos a aturuxar ó remataren a peza.

Perífrases terminativas

Expresan unha acción que se achega ó seu termo.

• CHEGAR + A + INF.: Non chegaron a convocar a asemblea.
• VIR + A + INF.: Ó final tódolos vultos viñan a estoupar
• ACABAR + POR + INF.: Acabou por mastigar o po do deserto.

Perífrases pasivas

• SER + PART.: O ónix foi gabado polo ourive.

Inicio:	Perífrases verbais
Páx. anterior:	A categoría de Aspecto
Páx seguinte:	Bibliografía