Airsoft/Mantemento do equipo

Mantemento das réplicas

A arma é un forte investimento, e é importante revisala para que funcione correctamente sen perder rendemento. Antes de realizar calquera revisión á arma non esquezas quitar o cargador, baleirar os disparos que poidan quedar dentro dela (dispara algunhas veces para que non queden bólas no alimentador ou na cámara interior), e quita a batería ou o gas. Primeiro empeza coa limpeza, e procura non raiar a superficie. Utiliza papel lene ou un trapo e unha mestura de auga e xabón. Elimina calquera sucidade do mecanismo ou do canón. Logo de limpar a arma debes lubricala, e no Airsoft debes usar só lubricantes de silicona, como spray de silicona, ou graxa de silicona, xa que os lubricantes de aceite destruirán as xuntas de goma e similares. Os lubricantes de aceite poden esnaquizar tamén a superficie dalgunhas réplicas.

réplicas de resorte

O mantemento destas réplicas é moi simple xa que son de simple construción. Os únicos problemas serios son cilindros e mecanismos danados ou gastados. Un canón obstruído débese a miúdo a bólas de baixa calidade e canóns mellorados. Un tubo de canón sucio causará un descenso de rendemento.

A rutina básica para manter as túas réplicas en boas condicións son as seguintes: se a arma sepode desmontar, desmóntaa e límpaa de po e partículas antes de lubricar as pezas. Utiliza un spray para aplicar unha capa fina de lubricante nas pezas que deslizan unha sobre outra, e non esquezas lubricar o HopUp e o anel de goma que sostén a bóla para que non se sequen. Limpa o cargador, pero non o lubriques (ou lubrícao pouco), para que as bólas non estean pegañentas e haxa atascos. Logo de lubricar elimina o exceso de lubricante do exterior cun trapo lene. O HopUp funcionará un pouco inestable ata que o lubricante excesivo se elimine.

réplicas de Gas

Estas réplicas son un pouco máis difíciles de manter, aínda que a súa construción é simple. Só fan falta uns toques para manter a arma de gas en bo estado. Basicamente, tódalas réplicas de gas teñen unha válvula, xa sexa no cargador ou na propia arma. Para manter estas válvulas en boas condicións, utiliza un desaparafusador (da medida adecuada) e con coidado retira a válvula. Pon unhas poucas pingas de aceite de silicona fino no depósito de gas, e volve colocar a válvula con coidado. Non apertes a válvula moi forte, simplemente deixa que se asente. Hai gas mesturado con aceite de silicona, co que esta operación pode evitarse.

réplicas BlowBack de Gas

As réplicas de BlowBack son unhas das máis hostís cando falamos de mantemento, coa excepción da caixa de engrenaxes dunha AEG. Pero o principio básico é o mesmo que para outras réplicas, e coa axuda do sentido común e un pouco de información calquera pode revisar unha BlowBack.

Tódalas réplicas de BlowBack se desmontan dalgún modo. Podes necesitar o manual para desmontar e montala correctamente. Aquí hai algúns consellos. Primeiro lubrica o depósito de gas como se explicou arriba, e logo de desmontar a arma localiza a xunta do BlowBack, que debe estar na parte superior, debaixo de míraa traseira. Lubrica o anel de goma. Non tires moi forte das pezas, porque algunha pode estar enganchada cun resorte, e non queres que ese resorte caia. Limpa e lubrica as superficies que se deslizan na parte superior e inferior. Só quedara montar a arma de novo e a revisión estará completa.

réplicas Eléctricas - AEG

Non hai moito que un xogador común poida facer para manter unha AEG, agás limpar o canón e ocasionalmente lubricar o HopUp.

Utiliza a ferramenta que vén coa arma para limpar o canón. Un extremo da barra está biselado, e úsase para quitar bólas atascadas no canón. Se unha bóla está atascada no canón, pon o seguro para quitar cargador. Suavemente introduce a barra co lado biselado cara a dentro. Tódalas bólas atascadas deben caer polo alimentador de bólas.

O outro extremo da barra ten forma rectangular cun buraco. Utiliza un anaco rectangular de roupa ou papel lene, pono a través do buraco e enrólao suavemente ao redor da barra. Lubrica o trapo cunhas pingas de aceite e suavemente empuxa a barra polo canón ata que alcance as marcas vermellas (antes de atinxir o HopUp). Saca a barra, substitúe o trapo e repite o proceso ata que o trapo estea limpo. Este proceso de limpeza débese facer cada 2000 disparos, pero se a arma se usou nunha partida moi sucia, o canón débese limpar despois. Un canón limpo é importante para o rendemento.

Á parte disto, a batería é a única cousa que necesita revisarse. Nunca sobrecargues unha batería, porque pode queimarse, e unha batería queimada nunca se comportará adecuadamente. A batería tampouco se ten que cargar pouco, xa que pode desenvolver un efecto de memoria e a capacidade diminuirá. A batería non se debe descargar totalmente, e a descarga debe deterse cando a voltaxe cae ao 70% aproximadamente (6V para unha batería de 8.4V). Cando o motor xa non ten potencia suficiente para mover as engrenaxes debes cargar a batería. Carga a batería en modo lento, para mantela nas mellores condicións. A carga rápida non é boa para as baterías, e a súa esperanza de vida diminúe. Non as cargues en menos de 15 minutos, e recorda que unha batería cargada de xeito rápido debe arrefriarse antes de usala e que non terá a mesma capacidade ca unha batería cargada de xeito lento. Os cargadores automáticos son os mellores xa que non poden sobrecargar unha batería.

Cargadores HiCap

As AEG son as únicas réplicas que teñen a opción de utilizar cargadores de alta capacidade. Estes cargadores deben revisarse cada 5000 disparos aproximadamente, pero a medida que o cargador envelleza os requirimentos de revisión incrementaranse. De igual xeito que coas AEG, deixa a unha persoa experimentada a revisión do HiCap. Para evitar avarías e aumentar a vida útil do cargador, procura mantelo afastado do po, a graxa, anacos de follas e bólas rotas.

Capítulo anterior:	Outros elementos
Capítulo seguinte:	Consellos