Sistemas informáticos multiusuario e en rede/Caixa

Sistemas informáticos multiusuario e en rede
← Volver a Modos de acceso	Caixa	Seguir con Fonte de alimentación →

A caixa é a estrutura que protexe todos os compoñentes internos que forman parte dun computador (placa base, procesador, memoria, dispositivos de almacenamento, etc.). As súas funcións son:

• Posuír unha estrutura sólida para protexer os compoñentes.
• Posuír unha estrutura estandarizada para poder ampliar o computador con máis compoñentes.
• Reducir o ruído xerado internamente (ventilación, discos, etc.)
• Permitir a refrixeración correcta dos compoñentes internos.

Partes

Cuberta

A cuberta adoita ser de material plástico ou metálica.

Pode ter distintas formas:

• Forma de “U” invertido, que se aparafusa á parte traseira do chasis. Nalgúns modelos aparafúsase pola parte dianteira, sendo preciso desmontar o panel frontal.
• Paneis independentes, un superior e dous laterais. Neste caso abonda con quitar o que se queira para acceder ao interior.
• Cubertas de apertura rápida, con sistema de peche, paneis de desprazamento lateral, parafusos rápidos, etc.
• Outros sistemas, propios de cada fabricante.

Chasis

É de metal. Debe aportar rixidez abondo aos soportes da placa base e as baías de expansión.

O chasis é unha estrutura fixa onde se fixan os seguintes compoñentes:

• fonte de alimentación,
• placa base,
• baías de expansión,
• ocos para as rañuras de expansión,
• ocos para os conectores posteriores,
• sistemas de refrixeración,
• altofalante interno.

Baías de expansión

As baías de expansión son espazos onde se colocan os discos duros, disqueteiras, lectoras de discos, etc.

Existen dous tamaños:

• 3½" (disqueteiras, discos duros, lectores de tarxetas, etc.)
• 5¼" (lectoras de discos)

De todos xeitos, existen adaptadores de 5¼" a 3½".

As baías clasifícanse en:

• Internas. Son aquelas que non precisan de saída ao exterior, como poden ser as destinadas aos discos duros.
• Externas. Son as que si que necesitan saída ao exterior. Para estas disponse dunhas cubertas que serven para protexelas cando non se utilizan e así evitar a entrada de obxectos ou po na caixa.

As unidades adoitan fixarse ás baías mediante parafusos, pero moitos chasis dispoñen de sistema de instalación e desinstalación rápida.

Rañuras de expansión

Son os ocos onde se fixan as tarxetas de expansión. O número de ocos dependerá do tipo de placa para o que se deseñase a caixa.

Espazo para os conectores posteriores

Estes ocos permiten a conexión aos distintos portos da placa base, que á súa vez se utilizan para conectar a esta os distintos periféricos (rato, teclado, monitor, etc.). Estes ocos dependerán do tipo de placa que soporta o chasis.

Altofalante interno

Ás veces as caixas dispoñen dun pequeno altofalante no chasis que se conecta á placa base. Grazas a este dispositivo pódense escoitar sons de aviso en caso de anomalías durante o arranque do computador, entre outras cousas.

Panel frontal

Os modelos que se poden atopar de panel frontal son diversos. Nas caixas de altas prestacións, coma as dos servidores, o frontal pode dispor dunha porta con chave que agocha os dispositivos e o botón de acendido.

No panel frontal pódense atopar os seguintes elementos:

• Un LED de alimentación.
• Un LED que indica a actividade do disco duro.
• Un botón para reiniciar o computador.
• Un botón (modelos ATX) ou un interruptor (modelos AT) para acender o computador.
• Saídas para baías de expansión.
• Conectores para portos USB, FireWire, Son, etc.

Parte traseira

É o lugar onde se atopan os conectores para os dispositivos externos. Estes espazos dependerán do tipo de placa que soporte o chasis.

A parte traseira adoita ter espazo para:

• Fonte de alimentación.
• Conectores posteriores.
• Rañuras de expansión.
• Ventilador da caixa.

Refrixeración

Nas caixas adoita existir, como mínimo:

• Un espazo na parte dianteira do chasis para colocar un ventilados que aspire aire cada o interior.
• Un espazo xusto baixo a zona da fonte de alimentación. O normal é que este ventilador expulse aire cara o exterior. A fonte de alimentación tamén dispón do seu propio ventilador ou ventiladores.
• Un espazo na cuberta lateral oposta ao procesador, xusto fronte a onde este vai colocado.

Tipos

Gran torre

É o tamaño máis grande de caixa, con un grande número de baías.

Semitorre

É unha torre de tamaño máis reducido que a anterior.

Sobremesa

É unha caixa de formato horizontal, e de menor capacidade en xeral que as semitorres.

Ultrafina

Caixa de baixo perfil, xeralmente difícil de ampliar.

Barebone

Caixa de tamaño reducido deseñada para conter inicialmente só placa base, fonte de alimentación e sistema de refrixeración.

HTPC

Son caixas para equipos de salón.

Server Rack

Deseñadas para montar nun armario.

Portátiles

Deseñadas para permitir a mobilidade do equipo.

Modding

Son caixas de aspecto personalizado.

Formatos

Con independencia do tipo de caixa, existen diferentes formatos normalizados, en función da distribución dos compoñentes. A día de hoxe o formato máis utilizado é o ATX. Velaquí unha lista de formatos de caixa:

PC-XT

É un formato obsoleto, o das caixas orixinais do IBM PC. É un formato horizontal, pesado e robusto. Levaban un interruptor de alimentación na parte traseira.

AT

Evolución das anteriores, pero co botón de alimentación na parte frontal. Existe nas variedades de torre e sobremesa. Foron o estándar durante moito tempo.

Baby-AT

Similar á AT pero de dimensións reducidas e formato unicamente horizontal.

LPX

En realidade non se trata dun estándar, senón dun tipo de sobremesa de altura reducida grazas ao uso dunha tarxeta adaptadora para poder pinchar as tarxetas de expansión paralelamente á placa base.

NLX

Deseño de IBM para substituír á LPX, é estándar.

ATX

Deseñado no ano 1995 por Intel. Serve para aloxar as novas placas base ATX e fontes de alimentación ATX. A parte posterior é distinta á dos modelos AT para poder incorporar os novos conectores das placas ATX. A fonte de alimentación tamén é distinta das dos modelos AT, con novas funcións. Existen distintas versións de ATX:

1. Mini ATX.
2. EATX, máis grande.
3. Micro-ATX.

WTX

Formato creado por Intel en 1998 orientado ao mercado profesional. Serviu para estandarizar os equipos profesionais de alta gama. Ten aproximadamente o dobre de ancho que a ATX.

SFF

Caixas barebone.

BTX

Nova especificación do 2004 de caixas para as novas placas base BTX. Dentro do BTX existen subformatos.

HTPC

Caixas para equipos de salón.

Ademais dos modelos anteriores non se deben esquecer os chasis para servidores “en rack”. Estes van montados nuns armarios bastidores onde se colocan coma bandexas e pódense extraer con facilidade.

Notas

Sistemas informáticos multiusuario e en rede
← Volver a Modos de acceso	Caixa	Seguir con Fonte de alimentación →