Sintaxe da lingua galega/Os sintagmas

Os sintagmas

Os sintagmas son palabras ou grupos de palabras que teñen mobilidade dentro da oración e que desenvolven determinadas funcións sintácticas tanto dentro da oración como dentro doutros sintagmas:

Hoxe - o carcereiro - colocou - un cadeado - na porta.

Na porta - o carcereiro - colocou - un cadeado - hoxe.

Para podermos estudar os sintagmas, temos que reparar...

• nos tipos de sintagmas,
• na estrutura dos sintagmas e mais nos seus compoñentes,
• na función sintáctica dos sintagmas e na función sintáctica dos seus compoñentes.

Á parte destes complementos, na oración hai outras posibles funcións sintácticas que veremos máis adiante como o suxeito ou o complemento oracional.

Tipos de sintagmas

Sintagma verbal

O sintagma verbal desenvolve a función de predicado. Contén dentro de si un núcleo verbal (verbo) e outros posibles sintagmas que fan a función de

• Complemento directo (CD).
• Complemento indirecto (CI).
• Complemento circunstancial (CC).
• Atributo (A).
• Complemento axente (CA).
• Complemento do nome (CN).
• Complemento de réxime ou suplemento (CR).

Sintagma nominal

O sintagma nominal contén como núcleo un substantivo ou unha secuencia que poida substituílo: pronome persoal, adxectivo substantivado, determinante en función pronominal...:

• Os cidadáns chineses acurralaron o rabaño. -> Eles acurralaron o rabaño.
• Os cidadáns chineses acurralaron o rabaño. -> Os chineses acurralaron o rabaño.
• Eses cidadáns chineses acurralaron o rabaño. -> Eses acurralaron o rabaño.

A presenza dun núcleo é obrigada, como en todos os sintagmas. Ademais do núcleo, poden aparecer determinantes e modificadores:

Sintagma adxectival

O sintagma adxectival contén como núcleo un adxectivo:

Os exames son cuadrimestrais.

A presenza dun núcleo é obrigada, como en todos os sintagmas. Ademais do núcleo, poden aparecer modificadores:

• Adverbios: Os miñatos son moi mesquiños.
• Sintagmas preposicionais: As gaivotas son mesquiñas de verdade.

Sintagma adverbial

O sintagma adverbial contén como núcleo un adverbio:

Están ben.

A presenza dun núcleo é obrigada, como en todos os sintagmas. Ademais do núcleo, poden aparecer modificadores:

• Adverbios: Están moi ben.
• Sintagmas preposicionais: Están ben de corpo e alma.

Sintagma preposicional

O sintagma preposicional está encabezado por unha ligazón que é unha preposición:

Os bacoriños alimentáronse con landras.

A presenza da ligazón ou preposición é obrigada. Tras o enlace hai un termo. O termo é un sintagma que pode estar constituído por unha soa palabra (núcleo) ou por varias:

• con landras.
• Os bacoriños alimentáronse con estas landras frescas.

Véxase tamén

• Cuestionario sobre os sintagmas