XML

XML (siglas de Extensible Markup Language, «linguaxe de etiquetas extensible») é unha linguaxe de etiquetas. Poderíamos dicir en realidade que se trata dunha metalinguaxe, xa que define unhas regras que poden aplicarse a todo tipo de documentos e que poden derivar en outras linguaxes de etiquetas máis específicas.

A linguaxe baséase na idea de que calquera información pode ser definida en forma de árbore. A linguaxe consiste en elementos. Estes elementos teñen á súa vez outros elementos. E estes outros. E así ata que toda a información poida ser definida completamente.

Información

Características

• Os ficheiros XML non dependen de ningún programa completo para poder abrirse, pois están escritos en texto simple.
• Permite aos programas informáticos ler e analizar facilmente os elementos dos documentos.

Aprendizaxe

Receita

Para introducirse no XML, non hai nada coma un exemplo práctico. E o mellor exemplo práctico é o dunha receita. Así que vexamos como se escribiría unha receita de polbo á feira en XML:

<receita>
  <ingredientes>
    <ingrediente>
      1 polbo de 1 quilogramo.
      <comentario>Mellor conxelado.</comentario>
    </ingrediente>
    <ingrediente>Pemento picante ou pemento doce (ou ambos).</ingrediente>
    <ingrediente>Aceite.</ingrediente>
    <ingrediente>Sal groso.</ingrediente>
  </ingredientes>
  <preparacion>
    <paso>Se o polbo non estaba conxelado, mazalo. Isto evitará que quede duro.</paso>
    <paso>Unha vez desconxelado ou mazado, poñer a ferver auga abundante. Cando estea a ferver,
    coller o polbo pola cabeza e mergullalo varias veces na auga (metelo e sacalo). Así se evitará
    que solte a pel.</paso>
    <paso>Deixar a cocer entre 40 e 50 minutos, dependendo do tamaño do animal. </paso>
    <paso>Unha vez cocido, escorrelo e cortalo cunhas tesoiras.</paso>
    <paso>Servir nun prato de madeira ─método tradicional─ ou calquera outro recipiente.</paso>
    <paso>Aliñar como se guste co sal groso, o aceite e mailo pemento.</paso>
  </preparacion>
</receita>

Como se pode apreciar, a receita é un elemento, delimitado polas etiquetas <receita> (etiqueta inicial) e </receita> (etiqueta final). Todos os elementos teñen unha etiqueta inicial e outra final que os delimitan. Dentro de cada elemento pode haber outros elementos, como «preparacion» e «ingredientes», que están contidos por «receita».