Sistemas informáticos multiusuario e en rede/Representación de vídeo

Sistemas informáticos multiusuario e en rede
← Volver a Representación de son	Representación de vídeo	Seguir con Operacións lóxicas →

O vídeo dixital consiste na gravación dunha certa cantidade de imaxes por segundo. O son relacionado coas imaxes almacénase de forma independente. Ambos (son e vídeo) comprímense mediante códecs, e para a posterior reprodución fai falla dispoñer de ditos códecs.

Formatos de vídeo dixital

AVI

AVI, siglas de Audio Video Interlaced ("Son e vídeo entrelazados") é o formato estándar de vídeo dixital para Windows. Indica como están entrelazados o son e mailo vídeo, sen especificar o códec utilizado.

DIVX

DIVX é un formato de vídeo comprimido propiedade da empresa "DivX, Inc", desenvolvido para Windows e Mac OS. A última versión utiliza o códec H.264 para o vídeo e o AAC para o son.

FLV

FLV, acrónimo de Flash Video, son ficheiros de vídeo comprimidos mediante o códec Spark.

MPEG

MPEG, siglas de Moving Picture Experts Group ("Grupo de expertos en imaxe en movemento"), é un grupo que desenvolve formatos estándar de compresión de son e vídeo. Por exemplo, o estándar de DVD utiliza a versión 2 de MPEG.

WMV

WMV, siglas de Windows Media Video ("Vídeo do Windows Media"), é un códec de vídeo desenvolvido por Microsoft que adoita utilizar o formato WMA para o son.

XVID

XVID ─cuxo nome é o resultado de deletrear DIVX ao revés─ é un formato similar ao DIVX pero libre ─baixo licenza GPL─.

Reprodutores de vídeo

Adobe Flash

Adobe Flash foi inicialmente desenvolvido pola compañía Macromedia. Utiliza gráficos vectoriais nos seus ficheiros de extensión SWF. Está xeneralizado o seu uso mediante un engadido que se instala nos navegadores web, e que permite asemade reproducir ficheiros de vídeo FLV.

GOM

O Gretech Online Movie Player é un reprodutor multimedia de licenza libre para Windows pola surcoreana Gretech Corporation.

Media Player Classic

O Media Player Classic é un reprodutor libre ─baixo licenza GPL─ desenvolvido polo proxecto guliverkli.

MPlayer

É un reprodutor multimedia libre ─baixo licenza GPL─ cunhas grandes capacidades e numerosas funcionalidades, que se poden ampliar mediante o uso de interfaces gráficas coma SMPlayer.

Quicktime

Quicktime é unha arquitectura multimedia desenvolvida por Apple, que inclúe un editor de vídeo e un reprodutor con soporte para a reprodución de retransmisións de vídeo e capaz de traballar con diversos formatos (MOV, AVI, MP4...).

RealMedia

RealMedia é un formato contedor multimedia desenvolvido por RealNetworks. Desenvolveuse especialmente de cara á reprodución de retransmisións.

VLC Media Player

O VLC é un reprodutor libre ─baixo licenza GPL─ desenvolvido polo proxecto VideoLan (os desenvolvedores orixinais foron uns estudantes franceses).

Windows Media Player

Desenvolvido por Microsoft, Windows Media Player é o reprodutor por defecto nos sistemas operativos Windows.

Resolucións estándar

• VCD: 352×288 píxeles.
• SVCD: 480×576 píxeles.
• DVD: 720×576 píxeles.
• BlueRay: 1920×1080 píxeles.

Sistemas informáticos multiusuario e en rede
← Volver a Representación de son	Representación de vídeo	Seguir con Operacións lóxicas →