Formación e orientación laboral/Extinción do contrato de traballo/Exemplos
Causas que orixinan a extinción do contrato de traballo
editarAlexandre traballa en «VELASVIR, S.A.», unha pequena empresa de reparación e mantemento de equipos de son. Alexandre incorporouse cun contrato de traballo por obra ou servizo determinado que tiña por obxecto a realización de tarefas de inspección dos equipos de son contratados para os eventos organizados polo concello de Monforte de Lemos (Lugo), localidade onde está situada a empresa.
As causas ás que se refire o artigo 49.1 do Estatuto dos Traballadores implican a fin da relación laboral:
- Por vontade de ambas as dúas ou algunha das partes: mutuo acordo entre o xerente de «VELASVIR, S.A.» e Alexandre ou dimisión deste último.
- O paso do tempo para o que foi contratado: a fin do servizo (inspección de todos os equipos de son contratados para os eventos organizados polo concello).
- Feitos obxectivos como, por exemplo, o falecemento ou a invalidez de Alexandre, a xubilación do xerente de «VELASVIR, S.A.» ou situación de forza maior que cheguen a imposibilitar a prestación do servizo (inundacións, incendios, terremotos, etc.).
- Incumprimentos das obrigas laborais por calquera das partes dando lugar ao despedimento ou mesmo á extinción por vontade do traballador: non se efectúa rigorosamente o pagamento do salario, realización de funcións que non lle corresponden a Alexandre, ofensas verbais, faltas continuadas de asistencia ao traballo, etc.
- Causas organizativas, técnicas, económicas, de produción ou de forza maior polas que a empresa procede á extinción (causas obxectivas) ou ao despedimento colectivo.
Abuso de dereito por parte do empresario
editarIria traballa en «OUTRORA, S.A.», cun contrato no que se indicou que recibiría unha formación técnica para adaptarse ao posto. O suposto no que a empresa extingue o contrato alegando que Iria non acadou o rendemento esperado sería considerado abuso de dereito por parte do empresario se a Iria non se lle proporcionou a formación técnica que precisa para conseguir un rendemento óptimo.