Análise e deseño detallado de aplicacións de informática e de xestión/Paso do esquema percibido ao esquema conceptual
Análise e deseño detallado de aplicacións de informática e de xestión | ||
← Volver a Etapas do modelado conceptual | Paso do esquema percibido ao esquema conceptual | Seguir con Características do esquema conceptual → |
Da fase de análise de requisitos obtense un esquema percibido en linguaxe natural, que representa os requisitos do sistema a deseñar. Este primeiro esquema describe o que queremos almacenar, e posteriormente irase refinando e normalizando sucesivamente ata obter outro esquema, este no modelo entidade-relación. É dicir, haberá que converter as frases da linguaxe natural en elementos do modelo entidade-relación.
Non existen regras estritas que establezan que elemento vai ser unha entidade, ou cal vai ser unha relación, pero si que podemos enunciar certos principios que, canda o bo xuízo do deseñador, axudarán na elaboración do primeiro esquema conceptual que posteriormente se refinará.
Existen varios sistemas para transformar a información expresada mediante a linguaxe natural, se ben se diferencian xeralmente en certas características:
- grao do coñecemento lingüístico que incorporan;
- sistemas de representación utilizados;
- cobertura;
- robustez;
- diálogo co usuario;
- grao de interacción con outras técnicas.
Enfoque para a análise de requisitos editar
Baseándonos en conceptos lingüísticos podemos achegarnos a un primeiro modelo conceptual partindo das seguintes heurísticas:
- Un substantivo (nome común) que actúa coma suxeito ou complemento directo nunha frase adoita ser un tipo de entidade, aínda que podería ser atributo.
- Os nomes propios adoitan facer referencia a exemplares dun tipo de entidade.
- Un verbo transitivo ou unha frase verbal é un tipo de relación.
- Unha preposición ou frase preposicional entre dous nomes adoita ser un tipo de relación, ou tamén pode establecer a asociación entre unha entidade e mailos seus atributos.
As seguintes heurísticas son un achegamento ao problema da categorización:
- Unha entidade é un obxecto de datos que ten máis propiedades que o seu nome, ou se utiliza coma operando nunha sentencia de selección, borrado ou inserción.
- Un atributo é un obxecto de datos ao que se lle asigna un valor ou se utiliza como operando nunha operación aritmética, lóxica ou tira de caracteres.
- Unha relación é un obxecto de datos que fai posible a selección dunha entidade por medio dunha referencia a un atributo doutra entidade.
Como se puido observar, non se trata máis que de regras baseadas no rol que un determinado obxecto desempeña no proceso da información. A clave está en combinar todas estas heurísticas entre elas e coa experiencia do deseñador.
O estudo das frases que definen os requisitos do sistema permite ir clasificando os distintos obxectos. Os verbos "ser" e "ter" presentan un interese especial:
- «É un» permítenos crear xerarquías de entidades.
- «Ten» é un verbo que posúe múltiples interpretacións, que serán máis ou menos específicas segundo a acepción do verbo na frase en que aparece:
- Relación xeral entre entidades, en cuxo caso utilízase o verbo coma outro calquera, sen unha acepción específica.
- Asociación de entidades cos seus atributos.
- Agregación de entidades para formar unha entidade composta.
- Dependencia en identificación ou existencia.
Existen outros aspectos a ter en conta, entre os cales cómpre salientar que do número das entidades (singular ou plural) poden deducirse certos tipos e graos das relacións.
Despois destas consideracións, aínda pode resultar bastante problemática a diferenciación entre entidades e atributos. É preferible interpretar o obxecto de datos como entidade en vez de como atributo para os seguintes casos:
- Se o obxecto de datos ten por si mesmo asociados outros atributos.
- Se o obxecto de datos estivese relacionado con outras entidades.
Todas estas regras e heurísticas poden axudar no paso do esquema percibido ao esquema conceptual. Porén, cómpre lembrar que se trata dun proceso iterativo, e que só mediante os refinamentos sucesivos se chegará a un esquema conceptual que reflicta fielmente a estrutura da información do organismo para o que se realiza o deseño da base de datos.
Análise e deseño detallado de aplicacións de informática e de xestión | ||
← Volver a Etapas do modelado conceptual | Paso do esquema percibido ao esquema conceptual | Seguir con Características do esquema conceptual → |