Análise e deseño detallado de aplicacións de informática e de xestión/Modelos de datos


Un modelo de datos é un conxunto de conceptos que poden servir para describir, a diferentes niveis de abstracción, a estrutura dunha base de datos. Co concepto de estrutura de datos referímonos aos tipos de datos, as relacións e as restricións que deben cumprirse para estes datos.

Categorías dos modelos de datos editar

Propuxéronse moitos modelos de datos, e podemos clasificalos dependendo dos tipos de conceptos que ofrecen para describir a estrutura da base de datos.

  1. Os modelos de datos de alto nivel ou conceptuais dispoñen de conceptos moi achegados ao modo en que os usuarios perciben os datos. Son unhas ferramentas de análise e son independentes do sistema de xestión de bases de datos que se use para manipular a base de datos. En realidade, o deseño conceptual debe facerse aínda cando o sistema final non use un sistema de xestión de bases de datos, senón ficheiros convencionais e linguaxes de programación.
    Os modelos de datos de alto nivel utilizan conceptos coma entidades, atributos e relacións.
  2. Os modelos de datos de representación ou lóxicos describen a estrutura da base de datos que pode procesar o sistema de xestión de bases de datos.
    Os modelos de datos lóxicos máis comúns son o relacional, o xerárquico e o de rede.
    O modelo lóxico depende do tipo de sistema de xestión de bases de datos e non é un sistema de xestión de bases de datos específico.
  3. Os modelos de datos de baixo nivel ou físicos proporcionan conceptos que describen os detalles de como se almacenan os datos no computador, é dicir, a integración da base de datos nun dispositivo de almacenamento secundario. Describe as estruturas de almacenamento e os métodos utilizados para ter acceso efectivo aos datos. Estes modelos dependen dun sistema de xestión de bases de datos específico. Estes modelos non están normalizados nin existen en realidade coma modelos, senón que son propios de cada sistema de xestión de bases de datos.

Modelo relacional editar

No modelo relacional úsase unha colección de táboas para representar tanto os datos coma as relacións entre estes. Cada táboa ten varias columnas e cada columna ten un nome único.

Modelo en rede editar

Os datos no modelo en rede represéntanse mediante coleccións de rexistros e as relacións entre os datos preséntanse mediante ligazóns, que se poden ver coma punteiros. Os rexistros na base de datos organízanse coma coleccións de gráficos dirixidos.

Modelo xerárquico editar

O modelo xerárquico é semellante ao modelo de reden, no sentido en que os datos e as relacións entre os datos se representan mediante rexistros e ligazóns, respectivamente. Este diferénciase do modelo de redes en que os rexistros se organizan coma coleccións de árbores en lugar de gráficos dirixidos.