Wikibooks

Análise e deseño detallado de aplicacións de informática e de xestión/Funcionamento dos sistemas de xestión de bases de datos

< Análise e deseño detallado de aplicacións de informática e de xestión


O fluxo de datos e instrucións entre os elementos é o seguinte:

  1. Prodúcese unha chamada dende unha unidade de execución ao sistema de xestión de bases de datos. Na chamada faise referencia á vista externa implicada.
  2. O sistema de xestión de bases de datos analiza a chamada e completa os argumentos coa información da vista externa á que fixo referencia na chamada, así como a correspondente á estrutura lóxica global e a estrutura interna con ela relacionadas. Esta información atópase previamente no dicionario de datos, dende onde pasa ao sistema de xestión de bases de datos.
  3. Unha vez comprobado o dereito da aplicación a utilizar esta vista, e despois de verificar a súa corrección, o sistema de xestión de bases de datos traduce a chamada converténdoa en ordes aos métodos de acceso ao sistema operativo, dirixíndose a este.
  4. O sistema operativo accede ao soporte secundario (disco), onde se atopan almacenados os datos.
  5. Os datos a recuperar pasan do soporte onde se atopa almacenada a base de datos á zona de almacenamento intermedio (búfer). De tratarse dunha inserción ou modificación pasarían en sentido contrario.
  6. Os datos son transferidos dende a zona de almacenamento intermedio á zona de traballo do usuario da unidade de execución dende onde se realizou a chamada, ou en sentido contrario de tratarse dunha inserción ou modificación, realizándose as correspondentes transformacións entre as representacións dos datos.
  7. O sistema de xestión de bases de datos, unha vez rematada a operación de manipulación (xa sexa recuperación ou manipulación), pasa á zona de comunicación os indicadores de estado, nos que sinala se a operación acabou correctamente ou non, ao tempo que se fornecen outras informacións sobre a operación realizada.
  8. A aplicación revisa o estado dos indicadores que se atopan na zona de comunicación da unidade de execución dende a que se efectuou a chamada.
  9. No caso de que a operación rematase correctamente, os datos que se atopan na zona de entrada e saída da correspondente unidade de execución xa pode utilizalos a aplicación.


Traído desde «https://gl.wikibooks.org/w/index.php?title=Análise_e_deseño_detallado_de_aplicacións_de_informática_e_de_xestión/Funcionamento_dos_sistemas_de_xestión_de_bases_de_datos&oldid=15269»